內地藝人吳亦凡最近一身蟻！佢陷入性醜聞，被微博紅人都美竹爆料，指佢開酒局選妃，仲涉嫌灌酒迷姦，有指涉及多位少女，當中更有未成年，指控相當嚴重，更陸續有疑似受害人企出嚟me too！都美竹更喺琴晚發最後通牒，叫吳亦凡喺今晚9點前開記者會退出娛樂圈，並手寫致歉信俾所有受害人，佢指今次係「決戰」！
今朝，吳亦凡親自上戰場，正式向都美竹宣戰，否認一切指控：「我已忍無可忍！本人只在2020年12月5日見過都女士一次，沒有灌酒，沒有收手機，更沒有她描述的各種細節。我申明，從來沒有過什麼”選妃”！沒有”誘姦””迷姦”！沒有什麼”未成年”！如果有，我會自己進監獄！」而佢工作室亦同時發聲明反駁指控，更表示已經向公安機關報案控告都美竹。
不過網友似乎完全唔俾面，留言清一色叫佢「滾」「他急了！」「媽我想吐」「滾出中國」，連部分粉絲都轉駄加入狙擊吳亦凡。都美竹亦留言表示未驚過：「能讓你身敗名裂。」
戰火烽煙四起，吳亦凡同時亦被一眾「品牌爸爸」割席，至少10個代言廣告同佢取消合作，包括立白、冰紅茶、LANCOME、王者榮耀、騰訊等。喺夜晚9點幾，「波子」保時捷亦宣布割佢波子，同吳亦凡終止一切合作。有指咁多品牌加埋，賠償金高達3億2千萬港幣！
Search